Rerahinan Saraswati
Suksma mungguing galah sane kapaica ring sikian titiang, sadurung titiang nglantur pacang ngaturang Dharma Wacana sane mamurdha “Rerahinan Saraswati” lugrayang titiang ngaturang pangayubagia majalaran antuk puja pangastungkara
Om Swastiastu
Dane Bapak Manggala sekolah sane banget kusumayang titiang
Para Dang Acharya utawi bapak lan ibu guru sane mustikayang tur subaktinin titiang
Para angga panureksa pacentokan Dharma Wacana ring SMA Negeri 3 Singaraja sane wangiang titiang
Para sisya lan pamilet pacentokan sane subagia
Inggih Ida Dane para bakta sinareng sami.
Wit saking pasuecan Ida Sang Hyang Widhi Wasa, presida titiang masadu ajeng iriki ring bale pengerawos SMA N 3 Singaraja, ring acara pacentokan Dharma Wacana sekadi mangkin
Rerahinan Saraswati, rauhnyane nangken Saniscara Umanis Wuku Watu Gunung, kebaos rerahinan nganutin wuku (pawukon) nyabran nem (6) sasih. Umat hindune sami pada sumuyug ngaturang bakti, nunas ring Ida Sang Hyang Widhi rauhing prabawan Ida pinaka Sang Hyang Aji Saraswati, sumangdennya, kapaica kaweruhan, tur kaweruhan sane sampun kapaica presida mawiguna pisan ritatkala anggen nabdabang jagat.
Ida Dane para bakta sareng sami.
Sang Hyang Aji Saraswati ngangge piranti simbul utawi pralambang jatma istri listu ayu matangan patpat, ngambel keropak, wina, ginitri, mesanding paksi merak, lan angsa, saha ngadeg ring luur sekar tunjunge.
Napi mungguing teges ipun? Sane mangkin pacang aturang titiang. Saraswati mawiwit saking rawos utawi kruna saras lan wati, saras artosnyane membah sekadi toya, wati mateges madue abah utawi sifat. Punika kaweruhane seterusne pacang nincapang kawerdian jatma istri listu ayu maartos kaweruhan punika sakadi teruni jegeg wiyakti nudut kayun (menarik).
* Wina punika piranti sajeroning gambelan mateges kaweruhan punika meabah rasa seni.
* Keropak pinaka genah wiwilan Sang Hyang Aji lan aksara.
* Ginitri pinaka pralambang kaweruhan punika nenten telas-telas kapaurukin.
* Sekar Tunjung pralambang kaweruhan punika suci.
* Paksi Merak pralambang kaweruhan ngicenin swabawa.
* Angsa pralambang kaweruhan punika ngicenin kewicaksanan.
Ida Dane sareng sami, tatujon ngelaksanayang pamuspan utawi upakara ring rerahinan Saraswati nenten ja lian wantah minehin tur ngeranjingang kaweruhan ring angga tur amunapi sida antuk ngelimbakang ring sajeroning maurip.
Ida Dane para bakta sareng sami, indik upakara sane kangkat anggen nyanggra rerahinan saraswati: suci, peras, daksina, pelinggih kembang payas, kembang cane sesayut Saraswati, rangkatan putih kuning, raka-raka toya kumkuman. Ngelantur tata titi ngemargiang upacara Saraswati, mangda semeng sadurung tajeg surya mangda sampun puput. Ngemargiang upacara upakara marep ring lontar-lontar pustaka, buku-buku suci miwah buku papelajahan.
Risedek buku-buku kaupacara tan kalugra nyurat lan ngwacen yening sampun wengi wawu raris ngemargiang semadi utawi ngewacen buku-buku suci.
Ida Dane sareng sami, pinaka paiketan rerahinan saraswati benjang ipun kawastanin banyu pinaruh, sane patut kemargiang inggih punika, wau metangi saking sirep, mesiram ke tukad, utawi segara makeramas, rauh ring jero muspa nunas kumkuman, ngalebarang bebanten saha ngewaliang lontar, pustaka, buku ring genah ipun soang-soang.
Inggih Ida Dane, rauh iriki presida titiang ngaturang Dharma Wacana mejanten nenten prasida ngeledangin kayun, raris titiang banget ngalungsur Agung Rna Pangampura. Inggih pacang puputang titiang antuk ngaturang paramasanti.
Om Santih, Santih, Santih Om
Sumber: sujanatajoen
0 Komentar