Contoh Teks Pidarta Dharma Wacana tentang Dharma Sedana berbahasa bali

Dharma Sedana

Inggih suksma aturang titiang mungguing galah sane kapaica ring sikian titiang, sadurung titiang ngelantur pacang matur ring ida dane sareng sami lugrayang titiang ngaturang pangastunkara

Om Swastiastu

Dane Jro mangku sane suciang titiang

Bapak manggala sekolah sane mustikayang titiang

Para Dang Acarya sane subaktinin titiang

Para sisya lanag istri sane tresna sihin titiang

Rumasa manubagia pisan manah titiang, ring galah becik sekadi mangkin. Seantukan wit saking paswecan Ida Sang Hyang Widi Wasa prasida titing masadu ajeng ngiringang iada dane para bakta sami nyarengin indik pamuspan ring rerahinan Tilem sekadi mangkin.

Mungguing dharma wacana sane prasida katur ring ida dane sareng sami sane mangkin, titiang ngindayang ngererehang judul utawi murdhan ipun inggih punika Dharma Sedana.

Ida dane sareng sami, yening buat teges dharma sedana punika sampun ketah tur lumrah pisan taler sareng sami sampun uning ring sajeroning teges, inggih punika napi sane prasida iraga atrurang anggen punia ring kahuripane sane mangkinsane manut ring ajaran agama druwe.

Ida dane sareng sami sane pinih mabuat pisan ngenenin indik Dharma Sedana punika, boya je teges rawos ipun sakemawon asapunapi iraga nglaksanayang tur ngemargiang ring kahuripane sekadi mangkin.

Manut saking eling ring hutange majeng ring Ida Sang Hyang Widi Wasa (Tri Rna), utaman ipun Dewa Rna, pastika iraga sareng sami madue swadharma pacang naur utange punika antuk ngenargiang Dharmaning Agama lianan ring punika ngemargiang Dharma Sedana.

Ring sajeroning manusa urip, sampun pastika babekelane punika sane pundut akehnyane wantah patpat sane kabawos Catur Bekel inggih punika Suka, Duka, Lara, lan Pati. Ritatkala nincap Suka, sepatute eling ring masedana utawi mapunia majeng ring wong utawi jatmasane mangguh pakewuh, taler masedana ring Ida Sang Hyang Widi Wasa sane marupa punia, ritatkalaning wenten wewangunan Pura,. Upacara, miwah sane lianan. Ritatkalaning wenten Panca Baya sane nibenin jagate taler nenten majanten pacang ngaturang wantuan sane marupa punia jinah, ajengan, miwah busana. Napi sane kaaturang tur kamargiang punika yening kadulurin antuk kayun lascaria ngaturang ayah maka sami ngranjing ring dharma sedana.

Ida dane sareng sami sane wangiang titiang, santukan Catur Bekel manusa hurip wantah asiki sane ngawinang bagia, wantah ring suka, sane malih katiga duka, lara lan pati nenten ngawinang bagia. Galah becik ngemargiang Dharma Sedana ritatkala wanengan Suka punika, yening sampun rauh Duka, Lara lan Pati mejanten nenten prasida pacang ngemargiang Dharma Sedana.

Inggih Ida Dane sareng sami, napi sane aturang titiang punika pacang mewali ring wirasan Ida Dane soang-soang, taler wenten filsafat Hindu nyinahang “Ikang Dharma Ngarania Widhi” teges ipun ring dija presida ajeg dharmane punika, irika pacang wenten sane kabaos realitas Ida Sang Hyang Widhi macihna sekala.

Sakemaon nenten makasami jatmane prasida ngemargiang Dharma Sedana saking lascaria, napi malih ring aab utawi masa globalisasi lan kali yuga sekadi mangkin ring soang-soang angga sariran imanusa wenten sikap sane mawasta sikap Hedonisme sane mateges manusa wantah seneng ngulati kasenengan indria sekantune wenten galah setata kaulurin indriane.

Inggih Ida Dane sareng sami, sekadi punika presida titiang ngaturang Dharma Wacana, tan bina sekadi nasikin segara tur akeh ature nenten manut ring kayun Ida Dane sareng sami. Maka pamuntat atur titiang, nenten lali titiang ngelungsur geng rna sinampura. Inggih mungguing galahe waliang titiang ring dane sang Ugra Wakya.

Om Santih, Santih, Santih Om

Siwaratri Pangleburan Papetengan Buana Agung lan Buana Alit

Suksma mungguing galah sane kapaica ring sikian titiang, sadurung titiyang ngalantur pacang ngaturang samatra lugrayang titiyang ngaturang pangayubagia majalaran antuk ngaturang puja pangastunkara

Om Swastiastu

Jro Mangku sane banget suciang titiyang

Bapak manggala sekolah sane mustikayang titiyang

Bapak kalih Ibu para Dang Acarya sane kusumayang titiyang

Saha para sisya sane banget manubagia.

Inggih ida dane sareng sami sane banget kusumayang titiyang.

Ring galahe sane becik sekadi mangkin, titiyang rumasa garjita pisan prasida nagingin acara dharma wacana sane becik lan suci puniki, napi mawinan seantukan ring rahinane sane suci puniki titiyang ngiringang ida dane, ngemargiang mejagra sinambi makayun-kayun ngayunin paripolahe sane sampun kemargiang rihin.

Ida dane sane subaktinin titiyang.

Siwaratri mawiwit saking kalih kruna inggih punika siwa miwah Ratri, Siwa mateges swabawan Ida Sang Hyang Widhi, Dewa Siwa, lan Ratri mateges peteng (wengi) wiyakti peteng detdet dados ipun siwaratri mayeges peteng (wengi) pinaka galah ngalebur papetengan kayun ngulati kagalangan kayun.

Menawita ida dane sampun ning tur tatas ring carita ngenenin pamargin I juru boros Lubdaka ngawit saking alas kapetengan ngantos munggah ring wit taru bila, ring luhur telaga, galah punika duk Purwaning Tilem Kapitu puniki sane kasengguh Siwaratri (payogan Ida Batara siwa sane kemargiang ring Catur Dasi Kresna Paksa, panglong ping 14 sasih kapitu.

Seantukan wengine punika pinih peteng ring Buana Agung, taler ngawetuang papetengan ring Buana Alit, raris Ida Bhatara Siwa ngicenin sundar mangda Buana Agunge terang saha manusa sane ngenargiang pejagran prasida taler munggah terang sesampune ngayun-ngayunin napi luwir pari polahe sane sampun kemargiang.

Ida dane sinareng sami, pinaka umat Hindu patut ngelaksanayang tur nyanggra rerahinan siwaratri puniki antuk ngemargiang yadnya utawi sembah bakti saha Brata Siwaratri sane kawentenan nyane maundag-undagan sekadi nista, madya, lan utama. Sane nista wantah ngemargiang jagra kemaon, sane madya ngemargiang jagra miwah upawasa, lan sane utama ngemargiang jagra, upawasa, miwah mona brata. Brata puniki kemargiang manut pangugon manusa soang-soang, mawastu polih tuntunan sane terang saha paripolahe sane salit nenten malih kemargiang ring kahuripan selantur ipun.

Tatujon ngemargiang Brata Siwaratri nenten ja lian wantah maurukang raga ngeret indriya utawi nabehin kedusan Sad Ripune, seantukan kedusan Sad Ripu sane gumanti pacing nyengkalen. Minekadi : Upawasa (puasa) pinaka muruk mabrata nenten ngajeng (makirangin loba) tetujon ipun mangda nenten saking ajeng-ajengan ngawe sengkala. Kaping kalih Jagra, matetujon mangda stata tangar nenten alamena mangda luput saking sengkala. Kaping tiga Monabrata mateges nenten ngerawos, pamekas rawos ala, seantukan saking rawos ngawe sengkala.

Ring Nitisastra sargah V nomer 3 kasinahang :

Wasita nimitanta manemu ayu

Wasita nimitanta manemu pati

Wasita nimitanta manemu ripu

Wasita nimitanta manemu mitra

Teges ipun:

Saking rawos pacang mangguh bagia

Saking rawos pacang mangguh sengkala

Saking rawos pacang mangguh meseh

Saking rawos pacang mangguh sawitra

Manawita asapunika ngiring margiang Brata Siwaratri puniki sakasidan maka tatujon angggen nabehin isad ripu seantukan : Tan hana satru mangelewihaning ana geleng ring ati (Nitisastra). Teges ipun : tan wenten meseh ngelintangin ring sane masusupan ring kayun.

Inggih Ida dane sane wangiang titiyang.

Seantukan kabanda antuk galah rawuh iriki prasida titiyang ngaturang wacana samatra, mejanten atur titiyang akeh sane nenten manut ring kayun, adoh ring surasa sami seantukan tikta prenateng madura, tan prasida rasa pahit pacang ngasorang ipun I gula drawa, maka pamuput atur titiyang lugrayang titiyang ngaturang pangampura. Galah waliang titiyang ring dane Sang Ugra Wakia.

Om Çanti, Çanti, Çanti Om

Sumber: sujanatajoen